Іван Міхайлавіч Чарнякевіч нарадзіўся 9 красавіка 1955 г. у вёсцы Плябанцы Пружанскага раёна Брэсцкай вобласці. Бацька, удзельнік Вялікай Айчыннай вайны, працаваў сталяром. Дзіцячыя гады Іван правёў у Пружанах, марыў стаць мастаком. Пасля чацвёртага класа паступіў у Рэспубліканскую школу-інтэрнат па музыцы і выяўленчым мастацтве ў Мінску, якую скончыў у 1973 г. Пад час вучобы сябраваў з Аляксандрам Ісачовым. У 1981 г. скончыў Ленінградскае вышэйшае мастацка-прамысловае вучылішча імя В. І. Мухінай па аддзяленні тэкстылю.